Akda ni Pastor Joeffrey Landicho
Mateo 21:1-10 Zacarias 9:9-10
Abril 05, 2009
Panimula:
Sa buong kasaysayan ng mga kilalang bansa, maraming mga bansa ang naitala sa kasaysayan, ang natalo at nasakop sa digmaan katulad ng Espanya, sinakop ito ng Morocco na pinamumunuan ng mga Morro na Muslim sa ngayon, at nasakop sila ng mahigit walong daang taon. Ang Pilipinas ay isa rin sa mga nasakop ng mga bansang imperyalista, sinakop siya ng mahigit tatlong daang taon, pinalitan ng Amerkano at Hapon. Ang kanilang pagpasok sa mga teretoryo at sa kanilang pangangalonya ay isang pagtatagumpay sa larangan ng pakikipagdigma at pananakop.
Ngayong umaga tingnan natin ang isang magandang kwento sa kasaysayan ng Bibliya “Ang matagumpay na pagpasok ng ating Panginoong Hesus sa lunsod ng Jerusalem”
Ngayon araw ang buong kakristianohan ay nagdiriwang ng Linggo ng Palaspas. Ang pagdiriwang na ito ay isang pag-alaala sa matagumpay na pagpasok ni Hesus at tinatawag na “The Joyful Entry or The Triumphal Entry of Jesus into the City of Jerusalem”
Sang-ayon sa mga mananaliksik ng Bibliya, ang pagpasok ni Hesus sa Jerusalem ay kanyang panawagan para sa isang bagong daan, isang pamamaraan ng pamumuhay, isang bagong ugnayan ng sangkatauhan. Ito ang dala niya para sa mga tao at gayun rin sa mga pinuno noong kanyang kapanahonan. Ito na rin pala ang kanyang huling panawagan, sapagkat ang sunod ay ang pagharap na niya sa kamatayan at paglalaan ng kanyang buhay, sa kamay ng mga kinikilalang mga relihiyuso at political authorities.
Kung babalikan nating ang kasaysayan ng ating Panginoon sa kanyang lipunan at panahon, ay tiyak na napakahirap mamuhay ng normal, dahil dahas at pananakot ang paraan ng mga namumuno, upang makamit ang kanilang nilalayon at minimithi. Ito ay dulot ng pagsakop sa kanila ng Imperyong Roma, at dahil dito iba’t ibang kilusang ang itinatag ng mga mamamayan sa layuning sila ay makalaya sa anyo at lebel ng ganitong sitwasyon o kalagayan, subalit ang paraan at pamantayan din ay nila ay pareho, dahas at pananakot naitatag ang panatikong makabayan at kilusang nagpapahayag ng armadong pakikibaka laban sa Imperyo ng Roma. Gayunpaman ipinahayag ni Hesus ang ibang paraan at porma tungo sa pagyakap sa kalayaan at kaligtasan.
Sa aklat ni Zacarias na nagsaad ng ganito “Zion magalak ka at magdiwang! Umawit ka ng malakas o Jerusalem! Pagkat ang hari mo ay dumarating na mapagwagi at mapagtagumpay, mapagpakumbaba siya at nakasakay sa biserong asno”.
Ang sulat ni Zacarias ay isang hula o propesiya noong panahon ni Darius na Emperador ng Persiya, na kung saan ang mga Isaelita ay na exile o naipatapon at nangalat sa buong imperyo ng Persiya. Isang hula rin ni Zacarias ang pagdating ng Mesiyas na siyang sugo ng Diyos para sa paghulagpos. Ang mesiyas na magdadala ng kalayaan, kapayapaan, at kasaganaan pabalik sa mamamayan ng Jerusalem, siya ay parang isang hari na papasok sa banal na siyudad, subalit hindi kagaya ng mga tradisyonal na praktis na ang mga hari ay nakasakay sa mga kabayong pangdigma na nagbibigay diin ng makapangyarihan bilang isang mandirigma.
Si Kristo ay isang bagong uri ng Hari, si haring Saul ay kilala sa lakas at kapangyarihang militar, si haring Solomon ay kilalang kilala sa kanyang kayamanan, katangyagan, karamihan ng kinakasama at katalinuhan. Subalit si Kristo ay kilala natin mapagpakumbaba, kailangan sakyan niya ang biserong asno, hindi ang mga kabayong pandigma, mga palaspas hindi sibat ang umalalay sa kanya, mga awit ng mga bata, hindi sigaw ng mga sundalo ang sumalubong sa kanya. Ang panawagan ni Kristo ay hindi dahas at pwersa, kundi kapakumbabaan, pagmamahal at magmamalasakit sa kanyang bayan.
Sa ating kapanahunan sa ngayon, kung ating titingnan mga kapatid! Ang lipunan ay napropromote ng apathetic system, o kawalan ng malasakit sa kapwa, at ito ay nangyari rin sa panahon ni Hesus, kung kaya’t binasag ito at binangga ni Hesus, maging tayo man mga kapatid labanan nating ang ganitong pwersa, ang kawalan ng malasakit at pagiging indibidwalismo.
Ang mga taong nakasaksi sa pagpasok ni Hesus sa Jerusalem, ay may iba’t ibang pagkaunawa, ang palagay ng iba ay ipinahahayag ni Hesus na siya ay tagapagligtas, ang mamumuno para sa paglaya ng Israel mula sa Imperyong Romano. Para naman sa iba, ipinahahayag ni Hesus na gagawin niya ang dakilang himala para sa mga Israelita, ang ilan naman ay nakaunawa na sumasakanya ang Diyos. Ang mga ito marahil ang naglatag ng kanilang balabal sa kanyang daraanan, ang nakalulungkot lang sa tagpong iyon ang mga taong ito sa panunulsol ng mga nasa kapangyarihan sila rin ang sumigaw na ipako siya sa krus” may dahilan si Hesus kung bakit siya tumangis sa Jerusalem.
SISTEMA NG PANAHON
Sa mga naging takbo ng kalagayan ng sandaigdigan, ang mga namamayaning pananaw ng tao ay ang kapitalistang kaisipan, katulad ng mga pananaw ng dapat ang pamantayan ng kadakilaan ay malaking kayamanan, sa mga negosyante, gaano ang aking tutubuin sa aking mga negosyo, kailangang malaki rin ang pakinabang. Ang ibig sabihin ng pananaw na ito ay pagkamakasarili, katulad ni Henry Sy ang may ari ng kadikadinang negosyo, na tuluyang pumapatay sa mga maliliit na negosyante, at dahil sa ganitong mga perspektiba, kung kaya umiiral ang pagsasamantala ng may ari ng malalawak na lupa sa mg magtatanim, ng may ari ng mga pabrika sa kanilang mga manggagawa, ng malalaking bansa sa maliliit na bansa. Ang mga pananaw na ito ay mas tumitindi pa, katulad sa kalagayan natin sa ngayon, patuloy ang pagtaas ng pagdarahop ng mga mamamayan at patuloy ang pagtaas ng mga pangunahing kailangan ng mga tao, at hindi pagtaas ng mga commodities, at gayundin tumitindi ang paggamit ng dahas, paglikha ng mga kagamitan pamuksa sa buhay at pangwasak, maipatanggol lang ang sariling interes, malaking tubo, malaking pakinabang, mauunawaan natin kung bakit may gera, itinataguyod ito ng makasariling at kapitalistang pananaw.
Ang daan ni Kristo ay kababaan, hindi makasarili o kapitalistang pananaw, kundi para sa buhay ng iyong kapwa, para sa buhay ng iyong kapaligiran at para sa buhay ng sanlibutan. Ang daan ni Kristo ay kaligtasan, hindi lamang sa iyong sarili, hindi lamang ng mga malalakas, kundi gayundin, kaligtasan ng mga maliliit at mahihina, ang kaligtasan ng Diyos ay para sa lahat.
Pangwakas
Ang Linggo ng palaspas ay patuloy na panawagan ng Diyos na unawain natin at tiyakin ang ating pagtitiwalaan at pagtatapatan, ang mga taong sumalubong kay Hesus ay mga taong lito at medaling malinlang. Sila ang sumigaw ng papuri sa pagpasok ni Hesus sa Jerusalem, subalit sila rin ang sumigaw ng “Ipako siya sa Krus” kailangan natin ang pagpapasya at matibay na paninindigan kung sino ang ating pagtatapatan. Ang Diyos at ang kanyang kalooban o ang tukso at panlilinlang ng sanlibutan. Kailangan ang batayan natin ay ang ating matibay na pundasyon sa pananalig sa Diyos upang hindi na tayo mahulog sa pagtataksil, ang buhay pananalig at pagtitiwala sa Diyos ang buhay ng sanlibutan, kailangan nating papasukin si Hesus sa ating puso at pagharian niya ang buhay natin. Amen
